Mbi tri javë nga arratisja e të dënuarit Radomiroviq, ende pa gjurmë
Kanë kaluar më shumë se tri javë nga arratisja e Gjorgj Radomiroviq, i dënuar me 14 vjet e gjysmë burg për vrasje, tentativë vrasjeje, posedim armësh dhe narkotikësh, si dhe falsifikim dokumentesh, por ende nuk ka asnjë gjurmë për vendndodhjen e tij.
Radomiroviq u arratis më 7 gusht nga Qendra e Paraburgimit në Mitrovicën e Veriut, ndërsa ndodhej në hapësirat e punëtorisë së burgut. Ai ishte kategorizuar si i avancuar dhe pjesë e listës për lirimin e mundshëm me kusht. Në momentin e arratisjes, nga dënimi i plotë i tij kishin mbetur vetëm 3 vjet e 7 muaj.
Pas ngjarjes, Shërbimi Korrektues i Kosovës pezulloi nga detyra drejtorin e Qendrës së Paraburgimit në Mitrovicë, një mbikëqyrës të lartë dhe dy zyrtarë korrektues, ndërsa hetimet e brendshme po vazhdojnë.
Për kapjen e të arratisurit janë angazhuar njësitë e specializuara të policisë, përfshirë Njësinë me qen (K9), por deri më tani kërkimet nuk kanë dhënë rezultate konkrete.
Policia e Kosovës u ka bërë thirrje qytetarëve që në rast se hasin në personin në fjalë, të njoftojnë menjëherë në numrin 192 ose në stacionin më të afërt policor.
